Makintoshq8

يازين قعدة البيت

السلام عليكم جميعااااااااااااااااااااا
شلونكم ....

من زمان عن المدونة والسبب البطالة ... والمفروض اجابلها لانه ماعندي لا شغله ولا مشغله بس الغريب انه على ايام الجامعه اقعد لما الساعه 4 الصبح على المدونات وحتى لما كان عندي فاينل ماكان يهمني .. شبه ادمان ولما تخرجت وفضيت ماقمت اجابل الانترنت ! شي غريب

طبعا انا من شهر 6 وانا متخرجه .. توظفت و حصلت على ترقيه صرت نائبه مدير ( اخاف بس )

انا مادري شنو النظام بالكويت ... قدمت الديوان قطوني وزاره الداخليه !! انا شسوي بوزراه الداخليه !
وكشت فيهم لا رحت رفضت ولا رحت وافقت .

قدمت على شركة البترول .. امتحنوني محاسبه وانجليزي .. وعقبها نادوني حق المقابله
الي صار انه المهندسين الي قاعدين يقابلون تخصص هندسه خلصوا .. والمحاسبه بعدهم .. فقالولي دخلي خل المهندسين يقابلونج ... دخلت وله 6 رياييل جدامي 5 حبوبين ومحترمين واحد ما يستحي على ويهه ومو عاجبه تخصصي .. يقوله شحقه ما رحتي هندسه !! يعني لي متى هالتخلف بالكويت ياهندسه يا طب وله انت مو كفو ؟؟؟
واحد من الاخوان يبي ينرفزني يقولي المحاسب مو هذا الي يمسك دفتر ازرق ريكورد وطربوش وقلم ازرق شحقه دراسه 5 سنين .. قلت له أي هذا بو طربوش اذا انت تبي تفتح مشروع في بيتك تقدر تستخم الريكورد والقلم الازرق .. بس لما تتكلم عن مشاريع كبيره تحتاج نظام محاسبي وقوائم ومدقق ومراجع يراجعون عليك ويسوون التسوية لانه انت راح تتعامل مع ارقام كبيره واصول غير نقدية . طبعا قبلها عطيته ضحكة استهزاء عشان يحترم نفسه

الثاني .. يقولي شلون تسوقين سياره .. قمت امثل له جدمت ريلي قلت له الحين ريلي على البنزين وهذي ايدي على السكان .. يستعبط يقول وايدج الثانيه وين ؟ قلت له مره على القير ومره اهدها مو شرط امسك شي ..

الرابع : قام يسألني عن تخصصي على قد معرفته البسيطه

الخامس : ادلين مناطق الكويت .. أي ادلها بس مو كلها .. ادلين قاروه وين صايره ؟

قلت له طبعا ادلها بس قاروه جزيره مو منطقه . قاموا يضحكون كلهم جنه قايله نكته و واحد غمز حق رفيجه
واحد منهم سالني ليش ماناخذ اعلى تخصص وبس ليش نسوي مقابله عاد جاوبته واستانس على جوابي الحبيب

الوضع كان انه انا بنت داشه ديوانيه حتى ماحسيت بخوف ولا رهبه بس كان ناقص اييب شيشه واحطها جدامهم


وعلى كل هذا ما ردولي خبر لا قبول ولا رفض وانا طالعه الا خالد العدوه معاه 2 شباب ( يا زين الواسطه القوية ) قلت بقلبي اي خير ان قبلوني اذا كل واحد يايب له نائب وله معرفه

قدمت على كل البنوك .. محد احترمني الا التجاري اليوم كان امتحاني هناك والوضع ما عجبني غرفه المقابله والامتحان مع بعض ... انا اركز على الاسئله وله اسمع الي يقابلونهم


واخر اكتشاف توصلت له انه الواحد بالكويت ... اذا ماعنده واسطه حق شغل .. يطلب افلام من راجوا بنص دينار اكبر كميه يقدر عليها .. ونفيش ودام الحين شتا ... يتحلف ويجابل الافلام

( تحملوني 6 شهور مو متحلطمة و عايشه بصمت تام )

اخيرا !!

السلام عليكم ..شلونكم ..

اخيرا
بعد 5 سنوات من الاعمال الشاقة
بعد 5 سنوات من الطريج الطويل والاشارات
بعد 5 سنوات من الامتحانات والريبورتات
بعد 5 سنوات من التعب
بعد 5 سنوات من حنة الوالده علي (قومي درسي)
بعد 5 سنوات من البجي
بعد 5 سنوات من التقديرات الي تفشل
بعد 5 سنوات من قعدة الصبح
بعد 5 سنوات من المشي الاليم
بعد 5 سنوات من حوسه المواقف
بعد 5 سنوات من كلمه حضور وغياب


تخـــــــــــــــــــــــــــــــــــــــــــــــــــــــــــــــــــــرجت


طبعا تخرجي كان بمعجرة .. الحمدلله الله سهل كل شي
تدرون شنو الوناسه بالموضوع .. انه يوم الاحد طلعت النتيجة .. وخلاص انا مو تخرج .. وبعد ماتفهم الدكتور ظروفي .. يوم الثلاثاء عرفت اني تخرجت .. يعني الفرحه كانت ماتنوصف
املي بالله كان كبير .. وماخاب من تمسك بهم أمن من لجأ اليهم
الحمدلله يارب

شكرا لـ : امي
شكرا لـ : اخواني وخواتي وشكر خاص حق بوحسن
شكرا لـ : لكل شخص اهتم ودعالي ودق يسال
شكرا لـ : للمدون علي الملا شكر كبير كبير كبير كبير

مو شكرا لـ : يوسف الزلزلة
مو شكرا لـ : كل دكتور ظالم
مو شكرا لـ : الي ما باركوا لي :P

My Mother

السلام عليكم

شلووونكم

-----

طبعا المفروض على وضعي الصعب والمتأزم بالجامعه المفروض اقعد ادرس واكل الكتب صفحه صفحه .. بس كبرت على الدراسه

-----

انا انسانه مليت سياسه التلفزيون .. مسجات .. البلوقات .. المنتديات .. الجرايد .. يمعات الاهل .. حتى المسلسلات فيها سياسه قاعده اطالع مسلسل الممثل يعني مرشح نفسه حق عضوية مجلس الامه .

----

My Mother Is UniQue

عيدميلادي كان اول شهر 6 وكملت 23 سنه .. بسرعة كبرت احس جنه توني قاعده بالروضه اقول قصيده ام الشهيد

يالله على قولتهم الواحد بروحه مو بعمره .. امبيه بس تحلطم الي يسمع عمري 70

خل اقول السالفه .. اختي سالتني شنو تبين حق عيدميلادج .. بعد التفكير قلت لها اني شايفه ملفع بمحل وعاجبني وصفت لها شكله .

عقب اسمع امي جان تقولها لا يما لا تشترين لها شي وفري فلوسج عشان تشترين بيت !!!

يعني اختي ال40 دينار راح تنفعها عشان تشتري بيت ؟؟؟ طالعت امي مره ومرتين قلت يمكن تتغشمر طلع لا من صجها !!

الموقف الثاني :

تبي خبز ايراني .. قلت لها من عيوني يالله خل اوديج

المهم الخباز الي بقطعتنا ماعنده سمسم لازم احنا نودي السمسم ... الوالده يت ومعاها جيس السمسم .. يوم يابت الخبز قلت لها خبز عادي ؟ وين السمسم عيل ؟؟

وله الخباز قايل لها انه السمسم الي يايبته مو راضي يلزق على الخبز لانه محموس .. سالتها ليش حامسته !! جان تقول لا انا مو حامسته بس هالسمسم الي طايح من البقصم انا قلت حرام اقطه .

انا هني ماقدرت اسوق السياره من الضحك ... واهي منحرجه جان تقولي يما لاتقولين حق احد عيب .. قلت لها من صجج !! والله السالفه نازله بالانترنت نازله

الموقف الثالث :

قلت لها مابي اكلف عليج بهديه عيدميلادي لانه وراج تخرجي .. بس ابي عطر كوكو شانيل

جان تقول يالله ييبي بوكي خل اعطيج 10 !!

يما انا مابي اشتري من سوق السلاح .. ماكو عطر سعره 10 الا وريحته اباط هندي

الموقف الرابع :

كنا بمصر بمحل معروف هناك يبيع اقطان .. انا كنت واقفه عند الباب من الزحمه وامي قاعده تكلم المصرية لكن كلام هندي

امي : ماما جيبي من هذا لون ازرق !

الي تبيع : عاوزة اللون اللبني

امي : لا ماما انا ما يبي لون لبن مايبي ابيض سرعه يصير وصخ جييبي ازرق ازرق

جان ادخل بسرعه قبل لاتقع كارثه : ماما اشفيج ترى اهي مصريه مو هنديه .. وبعدين اللبني يعني سماوي مو ابيض

هذي سالفتها كل مانروح مصر تكلمهم بطريقه هنديه معربة ليش مادري !!

الموقف الخامس :

رايحين الاميري عندها موعد اسنان .. المهم اهي راحت حق الدكتور وانا ناطره بالكراسي .. ويت يمي حرمه جان تقولي انتي بنت فلانة ؟ قلت لها اي وانا مادري منو

يوم طلعت امي جان الحرمه تروح تسلم عليها

امي : منو انتي ام يوسف ؟ ويي ما عرفتج وي شصاير فيج .. وي المرض ماكلج كلش ماعرفتج متغيره ماتستاهلين الي صار

الحرمه بعد كلام امي ما اشوف الا دموع اربع اربع وقعدت تشكي حالها

انا وايد عصبت قلت لها مره ثانيه لاتقولين جذي قولي كلمه حلوه مدحي بس مو جذي كرهتي الحرمه بحياتها

الموقف السادس :

معزومه شاي الضحى ومن ضمن الناس وحده بطنها كبييييير وايد

واهي طالعه الحرمه سلمت على امي .. جان امي تقولها الله يسهل عليج الولاده ان شا ءالله ويزرقج بولد صالح

اختي الكبيره ماتت ضحك جان تقولها ترى الحرمه مو حامل بس بطنها جذي

والمسكينه الحرمه ماتبي تحرج نفسها وتحرج امي قالت لها مشكوره خالتي

ملاحظة : ترى الوالده مو بخيلةا بس تصرفاتها تدل على الاقتصاد بس بالصج اهي مو جذي

------

اشوفكم بعد تاريخ 23-6

عسى اتخرج بس لانه الناس لوعوا جبدي واهم يسالوني ماكنتوش متى تتخرجين

ها ماتخرجتي ؟ ليش كليتج جم سنه ؟

دعواااااااااااااتكم

تغطية انتخابية

السلام عليكم
شلونكم .. اليوم رحت افتريت على المدارس عشان اشوف الاجواء الانتخابية طبعا الجو كان هادي وايد وايد وماكو اي تفاعل .. ماعدا منطقة رميثية والسره الي كان في جو انتخابي .. مريت على القادسية . السرة . الشعب . رميثية . سلوى . بيان . مشرف . ضاحية عبدالله السالم . الجابرية . الدعية والصراحة وناسه مالي خلق انطر بعد 4 سنين عشان اشوف هالسوالف مرة ثانيه :)

مادري ليش صورت حسينية الاوحد

هذي انا حاطه صوره حسن جوهر في بوكيه ورد احتفالا مقدما بفوزة يارب يارب يارب

جماعة عدنان المطوع . للاسف كان طاق مطر والجامة مو نظيفة

طبعا هذا صورته عشان صورة المرشح والنائب ان شا ءالله حسن جوهر

قائمة الائتلاف .. ماشاء الله عليهم

جماعة اسيل العوضي .. كانوا وايد حبوبات .. وقلت لهم بصوركم حق البلوق عادي ابتسموا

الجو كان روعة ماشاء الله

هذيل ربع رولا دشتي بالسرة .. سالته رولا شيعية وله سنية .. وكان رده مو من الجماعة . كان عندي فضول بعرف شنو مذهبها

عقب ما يعنااا انا واختي رحنا جمعية القادسية وشرينا ككاو والجمعية كانت متروسه مراهقين لابسين تي شيرتات مرشحين ويحوسون

هني نسيت اي منطقة بس الدائرة الثانية

شارع المدارس برميثية كان مزدحم نوعا ما

يونسون قاعدين بالوانيت ويسولفون مونسين عمرهم

ربع المطير يحوسون بالضاحية بسيارتهم

جماعة عدنان المطوع

الصراحة مادري منو هالمرشح بس كان يبتسم قلت لك بصورك وقالي ميخالف

جماعة السيد حسين القلاف .. خوش صورة طلعت .. عقب ماخذيت منهم الصورة قلت لهم صلوا على محمد وال محمد وماقصرواا

هذي ربع البطايق غير الي في سيارتي وغير الي في الجنطة

ظلم جامعة الكويت

صباح الخير
مساء الخير


جــــــــــــــامعة الكويــــــــت
جـــــــــامعة الكويت
جـــامعه الكويت

شنو اقول عنها ومن وين ابدي اصلا ؟؟؟

انا انسانة مليت من شي اسمه جامعة على كثر ما كنت احب الدراسة كرهتنا من اول سنه بالجامعة لانه اكتشفت اني ما اقدر انافق مثل باجي الطلبه عشان انجح واييب درجات
والنتيجة كانت الفشل المتكرر .. اول 3 سنوات كنت ابجي كل يوم وانا راده من الجامعة لانه انا مابي هالمكان وماكو احد اقوله الي بقلبي وحتى لو قلت ماكو فايده بقولون لي عقب 3 سنين تكلمتي .

بتكلم اليوم بس عن الدكاترة واصنافهم

الحريم : الحقد والغيره والنفسية الخايسه
معاملتها حق الصبيان غيـــــــــــــــــــــــــر وحق البنات غير
( ودي اذكر اساميهم بس ارد اقول حرام ) ولو انهم مافكروا الظلم الي يسوونه حرام
عادي عشان انت صبي والصبح تمر تقولها صباح الخير دكتورة شلونج والله اتفاءل باجي اليوم لي شفتج الصبح تعطيك احلى قريد . وذاك اليوم جدام عيني الصبي قالت له اقعد اقعد والبنت لما بتكلمها عند الباب قالت لها مشغوله امري شنو تبين ؟؟ بسم الله صارت مشغوله والاخ قاعد بسولف ( هذي استاذه لغة انجليزية )

والثانية زوجه - احد السياسيين الي عندهم منصب كبير
هذي الاخت نوعها تشوف العايلة .. اذا العايله اصيله .. وعندهم خير .. وبيوتهم بالعاصمه .. وتعرف احد من اهلهم بشاي الضحى وله استقبال بيييييييييييييييه البنت وله الصبي تحطهم على راسهاااااااا عادي ما يداومون وتعطيهم فل مارك على الحضور .. وتدلعهم جدامنا ها لولو شلون الوالده ؟
لطوفه اختج ما ولدت ؟؟
وله بالامتحان .. الوقت بعده ماخلص يالله ترى يعت بروح البيت اتغدى مع العيال ؟
والله محد قالج اخذي محاضره الساعه 2 وامتحنينا بهالوقت ؟؟

نصيحة : البنت لا تفكر تاخذ عند دكتورة
وان شاء الله حتى بالشغل لو حطوني بمكان ومسؤولتي حرمه راح انحااااااااش واقعد بالبيت على معاش ابوي الله يرحمه ولا اقعد بمكان المسؤوله حرمة

وهم حق مجلس الامه .. ادري مو الكل بوافقني بس خلاص صارت فيني عقده
مستحيل مستحيل اصوت حق حرمه .. لو احس انها احسن وحده بالعالم هم راح اقول لا ثم لا ثم لا ثم لا . اصوت حق الحفيتي ولا اصوت حق حرمه

الدكاترة :
النوع الاول : انتي ليبرالية . مو متحجبه .. تلبسين سوالف تخدش الحياء
انتي A student والبونص حقج يكون غير .. واشكرا واحد منهم قال حق وحده من الي يعزهم انتي شحقه تحجبتي شنو هذاااا ؟؟؟ تدرين لو مرتي تتحجب ثاني يوم بيت اهلها . اممممم الله يكون بعونك

النوع الثاني : محترم نوعا ما ... يحب السوالف وملاقه البنات والشباب يبون الطلبه يسولفون معاهم .ويضحكون بويهم .ويمدحونهم كل ما يشوفونهم عشان يحسون انهم محبوبين . في دكتور تمويل يوم اقوله انا درجاتي مو C اكثر ليش يعني ؟ يرد علي انتي ما تتفاعلين بالمحاضره . التفاعل المقصود فيه اني اضحك على الكلام السخيف الي يقوله والقصص المليقة الي صارت معاه بامريكا ولا اروح اسلم عليه .

النوع الثالث : الي يحب البنت المؤدبه ويساعدها من غير لا تدري بس عشان ادبها واخلاقها واحترامها بالمحاضره ... وهالنوع على راسي وبذكر اسامي الي ذاكرتهم لانه فعلا يستحقون الشكر على اللباقة والاحترام والطيبة الي فيهم
د.رائد غلوم حسين ( صاحب الصورة)

أ.سعود العبدلله
د.طارق العلوي

وهذا مقال له :http://www.elaph.com/ElaphWeb/NewsPapers/2005/7/76644.htm?sectionarchive=NewsPapers

د.حميد سيد القاهري

النوع الرابع : النوع النحيس .. الي يحب يسقط ويحب يخلي امتحاناته صعبه لانه فيه نقص يدري شرحه مامنه سالفه ولا في أي طالب فاهم شي من الي يقوله
اهوا فاهم بس ما يعرف يوصل المعلومه ويحط حرته بالطلبه
امتحانات ماتنحل .. ينقص بالدرجات على كيفه
والاحلى من هذا كله لما ينقص 5 درجات عشان الحل مو مرتب
مادري وين قاعدين ؟؟ يبي افرش جوري وانقش الورقه عشان يرتاح ؟؟



النوع الخامس : وهذا النوع النادر الي زين مع الكل وطيب وشنو يبون الطلبه يسوي لهم وهالدكاتره يصير على كلاساتهم زحمه لانه ماكو فرق بين الطلبه لا على اساس شيعه وسنه ولا اساس بدو وحضر ولا على اساس كويتي وغير كويتي يعامل الكل نفس الشي .وسلس بالتعامل وحبوب يمشي ويضحك وكل همه انك تخلص من الماده وماخذ القريد الي تبيه ( وهالنوع اصلا مو موجود بالعلوم الاداريه كلش ) لكن في بالحقوق د. فاضل نصر الله

ترى في بعد انواع بس لو بذكرهم مااراح اخلص والود ودي احط الاسامي عشان يمكن يتعدلون

واخر شي ابي منكم دعوه صادقه من القلب اني اتخرج شهر 6 وافتك من الظلم الي موجود بالجامعه .. على فكره انا من الطلبه المليقين الي يحضرون الكلاس ويردون البيت حتى كافتيريا الكليه قاعده فيه يمكن 3مرات خلال 4 سنوات ونص يعني اذا ماتخرجت احتمال كبير تصير فيني صدمه نفسية فلاتنسوني بالدعاء كل يوم خاصه مدام ين اتفاءل في دعواتج :)

اقســــم

مرحبــــــــــــا

انا شفت دعايه اقسم باليوتيوب فقط .. واكيد وايد ناس تطنزوا عليها وكتبوا ..
عاد وانا رايحه الكليه ( الله ياخذها من كليه) اشوف بالطريج معلقين اعلانات والاوادم تقسم بالخرابيط .. يعني حجي بدون فعل .. احس دافعين فلوس على الفاضي ماكو نتيجه يعني شالهدف ؟؟

عاد انا قلت لازم اقسم حالي حالهم صج اني مو فنانه ولا دكتورة ولا شخصيه مشهوره
بس يمكن قسمي احسن من هالمشاهير ..



اقسم .. ان الديره كلها واسطات
اقسم .. ان الناس عايشين على المظاهر
اقسم .. ان الرجيم اصعب شي بالدنيا

اقسم .. ان جامعه الكويت كلها ظلم بظلم
حتى بندوة مرزوق الغانم صوروااا جم جريده وكلهم مصورين لي السطره الي جدامي شدعوه جان ونستوني بصورة ؟ لي هالدرجة جيكره

اقسم .. انه النواب 3\4 مو كفو يدخلون المجلس وحدهم مجلس اداره (بقاله) مو جمعيه حتى

اقسم .. انه اكثر ديره مافيها تخطيط الكويت

اقسم .. انه كل الشباب صارت هوايتهم التصوير

اقسم .. انه الاتحاد الوطني لطلبة الكويت راح يكون حق الائتلافية لي يوم القيامه

اقسم .. انه اكثر ناس منافقين .. الي منخشين تحت الزي الاسلامي ويتكلمون عن الدين ( واهم ما يدرون وين الله حاطهم وشنو حلال وشنو حرام) (( اقصد فئه معينه وليس الجميع ))

اقسم .. ان كل نائب يصرح بالجريده ما يستحي على ويهه .. وكل مرشح يصرح بالجريده غبي ويحس الشعب غبي مثله

تعالوا شوفوا معاي التصريحات النارية .. الصراحه اقنعوني ( اخاف بس)

الدويش : توقيت ازالة المصليات ينذر بنشوب ازمة لا نعلم مداها ؟؟

احلف بس ؟ لا تكفه احلف ؟؟ ما يفهمون الوزير شقال ؟ مايفهمون الفتاوي الصحيحه شقالت ؟؟

عيد ملفي : الاسرة اساس المجتمع ودعمها ضروري .

صج والله ؟ محد قالي ؟ شالتصريح السخيف لو انا صحفية اخلي التصريح هذا بجريده الوسيط او 808080

مخلد العازمي : نتطلع الى تعليم يتماشى مع الاتجاهات العالمية .

مادري اضحك وله ابجي .. انت جم سنه بالمجلس ؟؟ وينك ؟؟ توك في 2009 تذكر التعليم ؟

الظاهر الحجي خلص

بشيرالعتيبي : اوباما جاء من رحم الفرعيات

الصراحه اخلي التعليق لكم على اخر تصريح .