انت كويتي مو يعني ملاك

مــــــــرحبا جميعا ً

بما اني مو من رواد المطاعم كلش ( فيني وسواس حلال وحرام ) وبما انه اللحم والدياي كله مثلج ومادري من وين يايبينه فأنا اكتفي بمطاعم محدده وتوصل لي البيت ( الازرق بشارع عمان - كباب الحجه - البطريق - ليتل سيزر بيتزا خضار فقط )
وبما ان صارلي فتره موطالعه من البيت اختي قالت لي خنروح فرايديز ورحنا فرايديز الافنيوز طبعا طلبت باستا من غير دياي مو هذا المهم
الطاوله الي ورانا كان فيها ريال يمكن عمره 33 سنه ومعاه زوجته وعياله المزعجين 3 ( ولدين وبنت ) وشكلهم كلهم نفس العمر مادري شلون ... الريال من اول ماوصل ومبين انه مو مضبوط اهوا وعياله - اول مادخلوا عياله صرخوا يباااااااااااااا كاهي طاولتها ميخالف يهال ومستانسين
الابو بصوت اعلى منهم : ايييي طاوله كل مره هاهاهاهاهاي ( انا مادري شنو كان يضحك بس يالله ويك اند ويبي يستانس ميخالف )
الام مالها حس كلش كلش - المهم الريال طلب ولما وصل الطلب كان صحن واحد منهم غلط ( مساكين زحمه مو طبيعيه عليهم ماصار شي)
وقام يصرخ هذا مو طلبي اشفيك انت ؟ من ياكله؟ محد ياكله يالله يالله غيره غيره الحين

الويتر ماقال ولاكلمه راح وغير الصحن
شوي وله يعلي صوته وينك انت تعال .. هاك شيلهم يالله شيل القفاش وصخين غسلهم كلهم
المصري المسؤول عليهم قال حق الويتر اغسلهم اوي اوي اوي اوي
رد الريال الكويتي : ايي اوي اوي اوي اوي بصوته المزعج العالي
كلوا مع الازعاج ومع جم طقه حق ولده ومع صراخ بنتهم
عقب جان يقول : انت هيي يا بو اوي اوي اوي عطني كلينكس @@

انا هني صج عصبت وقمت من غير لا اكمل اكلي لانه عدوي اللدود قله الاحترام
الحين المصري ماقالك شي عشان تكلمه بهالطريقه وبعدين هذا مسؤول مو سايق عند أبوك

واخر شي حتى 50 فلس ماعطى الويتر

الي بوصله يا جماعه لي متى بعض الكويتين شايفين نفسهم ويعاملون اصحاب الجناسي الثانيه باسلوب سوقي ؟
والله ضاق خلقي ونفسيتي انسدت من الموقف الي صار .. يمكن ايي اليوم الي الكويتي يشغل عندهم صح وله لأ كل شي ممكن يصير

الولد معفوس الملامح صاحب الصوره المو لطيفه ( ولد اختي )
هذا الصبي ابخل ماخلق ربي .. ابخل من حنظل بخالتي قماشه وابخل من بونبيل في محظوظة ومبروكه من ابرز مواقفه :
-امس خذيت منه كلينكس معطر وعطاني ياها بكل رضا وبعد ما مسحت ايدي خذا الكلينكسه وصفطها ورداها بالعلبه @@
- في مره ابوه كان حلمان حلم تفسيره مو زين وقام قط صدقه بحصاله الصدقات وعقب ساعتين رد ابوه يضحك - الشحيح ياب الحصاله قال حق ابوه يالله طلع الفلوس انت الحين صرت زين
- لما يطلبون من اي مطعم اهوا يبي يروح يدفع الفلوس والسبب عشان ياخذ باجي الخرده لانه ابوه وامه يعطون الباجي حق الريال الي وصل الطلب

- حتى ما يرضى احد يصوره يغطي ويهه واذا بين ويهه لازم ياخذ الكاميرا حقه .

- عاد اليوم الله هاديه يايب لي هديه الورده الصفراااء الي بالصوره بصراحه حدي استانست ودمعت عيني ( كل شي يبجيها) لانه ذكرني ولو انها بلاش شالعها من الحديقه بس لها مكانه بقلبي

اليوم الصبح قبل لا اروح الكليه ( ودي اتقاعد من الدراسه بس مايصير ) قاعده اقرا الجريده وله اشوف هذا الاعلان
بس حبيت اضيف على شروطه :
1- ان تكون الفتاه ذات ملامح جسديه انثويه واضحه
2- لديها القدره على الاغراء وكشف اكبر قدر من جسدها
3- ان تكون طايحه حظ ولا تقبلها اي شركه انتاج محترمه
4- ان يكون الرجل انسان واطي وماعنده سالفه بالحياه
5- لديه الامكانيه على تطويل اللحيه في حاله التمثيل عن الارهاب
6- ان يكون ذو شعر جميل وممكن عمل سبايكي
7- ان تقبل الفتاه بوضع مساحيق التجميل الفضائيه وتغير شكلها الى ان تشبهه القرود
( الحين اهوا طالب حسن وحسنه المظهر انا ما اشوف ولا احد من الي بشركه انتاجه عندهم مظهر من الاساس عشان يكون حسن)




وايد سولفت صح